* ياما اتعلمت *
ياما اتعلمت حاجـات وحاجات .. من الزراعــــة والنباتـــــات .
**********
اتعلمت ان اللي بيزرع .. لازم يوم يجني الثمرات .
والثمرة الحلوة عشـــــان تطلع .. يلزم لهـــا جهد وأوقـــات .
**********
في الريف سمعت كلام يتقال .. مليان حكم و كتير أمثال .
ماتقولش أبدا دا شيئ محال .. دا الزهر يطلع م الأبصال .
بعد المطر ما تلقى رياح .. بعد التعب يرتاح البال .
وكل شيئ في الكــــــــون دوار ... وكل ليـل من بعده نهــــــار .
**********
وسمعت ياما ف جو الريف . كلام جميل وبدم خفيف .
مثل يقول ان الحداية ... مابترميش أبدا كتاكيت .
والغربـــان ما تجيبش هدايــــا .. والفار عمره ما يزرع غيــــــط .
**********
وسمعت ياما كتير من شجرة . حكايات فيها مليون فكرة .
شفت كمان في النخلة العالية . طباع جميلة وأخلاق عالية .
عزة وصلابة مع الطيابــة ... مــــاتتوصفش بأي كتابــــــــــــة .
**********
واتعلمت كتير وكتير .. من البلابل والعصافير .
إني مــــــــــــــاحبش أبقى أسير ... حتى ولــــــــــــو في قصر كبيـــر .
***********
وعلمني حمام البنية ... حب الأوطان والوطنية .
من غير مدرسة من غير كليــة ... ولا من نشيد ولا من أغنيــــــــــة .
**********
واتعلمت كتير م النحلة .. نظام لكل مدينة ودولة .
فيــــــــها الايدين كلها شغالـة .. من غير كلام وعتــــاب وقوالــــة .
**********
واتعجبت كتير من نملة .. ماشية وشايلة قدها رملة .
قلت قوام سبحان الله ... ولقيت قلبي سمى وصلى .
شفت النمل يساعد بعضة ... ما جابش خنفسا مرة تساعده .
عــــــــارف أن مفيش غيـــــر إيده .. هي اللي حتساعده وحتفيــــده .
**********
شفت كمان بالميكروسكوب ... مخاليق تانية أمم وشعوب .
خلايا حية رايحة وجاية ... والمترصصة زي الطوب .
كلها بتقول للإنسان ... بص كمان دا الكون مليان .
وما يبقاش نظــــــرك محــــدود ... دا العقــل ما بيعرفش حــدود .
**********
علمني زهر البستان .. التنسيق بين الألوان .
والألوان مهما بتتخـــاصم .. تتصـــالح بادين فنــــان .
**********
واتعلمت من الصبار ... إن الجمال دا له أسرار .
وشفت في زرع الصبار .. معاني أجمل م الأشعار .
الصـــــــــــبر حـــــــلو مع الإصـرار .. لكنه ويا الضــــعف مرار .
**********
ولســــــــه باتعلم ف حاجات .. من الزراعـة والنباتـــــــات .
**********
ليست هناك تعليقات:
إرسال تعليق